وامركم شورى بينكم


كل واحد منا بيحتاج أحياناً للمشورة أو للنصيحة واذا اَي حدا عندو الانسان الصح والثقة لا يتردد بطلب المساعدة لانو بكون رب العالمين سخرلو ياه ليساعدو باْذنه و رحمته

قصتنا اليوم على شب دور كتير وحاول كتير يتغير ونسي جارو الحكيم يلي كان جنبو بيوم من الأيام طالع ع شغلو والأفكار كالعادة اكلة مخو والهم معبي وشو ولانو رب العالمين بسخرنا لبعض شافو جاره الحكيم قلو شبك يا جاري تفضل نقعد واكيد هو حس بتقصيرو لجاره الحكيم واستجاب لدعوتو

وقَعَدو سوا

سألو شبك يا اسامة شايف الهم معبي وشك صاير معك شي قلو والله بضربا شمال بتجي يمين بضربا يمين بتجي شمال ماعم تزبط معي

الحكيم : شو العائق بينك وبين تحقيق حلمك؟؟

اسامة:الظروف ما بتخليلي وقت اسعا لحلمي وما بتخلي معي الفلوس لحققا...

الحكيم: بتتمنى تتغير ظروفك للاحسن؟؟

اسامة: بتمنى انو تتغير مجرى الظروف ضدي وتصير معي...

الحكيم: والله شايفك بتنتظر المستحيل

اسامة:عندك شك بإمكانية تغير ظروفي..

الحكيم : الظروف رح تتغير أكيد بس اذا ما ناسبتك اليوم ما رح تناسبك بكرا رح تلاقي فيا شي يعيقك دائماً...و مشاغل الانسان بتزيد كل ما كبر بالعمر...والعاقل يلي ما بخلي ظروفه تتحكم بمصيره...

اسامة: يعني بتتوقع انو بقدر أتناسى الظروف يلي بتشل حركتي مع اني بعيشها كل يوم وبصير موقف كل ساعة بذكرني فيها

الحكيم : رح يضل الوضع هيك طالما بتهتم فيها وما بتهتم بمؤهلاتك وطاقتك..

اسامة: مؤهلاتي شي وظروفي شي تاني وانا مابدي الا الشي يلي يشجعني قدم عليها بثقة...

الحكيم :بتعرف احسن وقت لزراعة شجرة مر من عشرين سنة واذا زرعتا هلىء يمكن تكبر خلال خمس سنين بارتفاع بتحلم فيه

بالتشاؤم بتخسر حلمك وبتروح عمرك..

عندك طاقة لو توفر بعضا لحدا ظروفو اصعب منك لقدر يصنع حياه مختلفة عنك

اسامة :كيف وانا من وقت كنت صغير عندي خوف من المجهول ؟؟

الحكيم : اطلع على كل الناجحين واقرأ سيرن رح تشوف اكترن بدأو من دون فلوس وماعندن تعليم لا مو بس هيك وفِي منن تربو بظروف قاسية بس وقت ما لاقو ظروف تعينن بالحياة صنعوها ما كان عندن حل الا الجرأة فصار عندن شجاعة المغامرة

اسامة:يعني انت بتعرف انو الموضوع بدو مخاطرة!!!

الحكيم : الجرأة شيء والتهور شي تاني فرق كبير بين يلي ما لاقا سفن الانسحاب ف ما شاف الا التقدم هو الحل الوحيد أو يحرق سفن الانسحاب بإيدو

ف لو اطلعت على حياتك البائسة رغم كل شي بتملكه من عناصر تفوق فيا رح تشوف حالك ادي محظوظ كتير لتحقق حلمك

اسامة: يعني اطلع على مؤهلاتي وقدراتي وما انظر للمصاعب

الحكيم: مصاعبك هي يلي نستك طاقتك لحتى شفت حالك ضعيف ادامها

خليني اطلب منك طلب ... تسكر عيونك وتفكر بمسيرة حياتك وشو حققت فيا وبالتحديات يلي واجهتا خلالها وحط ورقة و قلم وعميل جدول واكتب ع يمين عن المواهب يلي عطاك ياها ربنا الخَلقية والخُلقية والنعم يلي عطاك ياها ربنا وعلى الجهة اليسرى قائمة بالمهارات والخبرات يلي اكتسبتا بحياتك واكتب برأس الورقة حلمك يلي بتهدف لتحققو وحط الورقة ادام وجهك ع باب الغرفة حتى تكون اول شي تشوفو وقت تصحى وآخر شي بتشوفو وقت تنام هيك رح يصير اهتمامك بحلمك بدل مشاغلك وعلى مؤهلاتك بدل مصاعبك

اسامة :بتتوقع هالشي ينجح

الحكيم :اذا انطلقت من مؤهلاتك وطاقاتك و ركزت اهتمامك على حلمك مو ع نقاط ضعفك واخدت قرار حتى تمشي واجتهدت وسعيت بدون تشاؤم أو استهزاء ف رح تحققو أكيد وتذكر مقولة كويلو الشهيرة اذا طلبت شيء بقوة سيتآمر العالم في مساعدتك على تحقيقه

اسامة انبسط وارتاح وحس انو عرف شو الحل لمشكلتو يلي مو قدران يفكر فيا نحنا بشكل عام بالورقة البيضا يلي فيا نقطه سودا صغيرة منركز ع نقطه السودا ومننسا كل البياض ف لازم الانسان دايماً يشوف نص الكاسة المليانة وما يتشائم لانو غيرو ماعندو حتى الكاسة ليتعبا فيا مي ويشوفا ف بضم أيديه ليشوف ادي المي نعمه من ربنا وادي صافية وشفافة😊

مواضيع سابقة
  • Facebook Social Icon
  • Twitter Social Icon

©2017 BY ANFAS-ALROUH. PROUDLY CREATED WITH WIX.COM