الجوهر

بمدينة قروية صغيرة كان في عيلة الله أكرمن بطفل بالخلقة التامة والحمد لله بس كان لونو بشرتو غامقة كبر الطفل بس ما كان يتأقلم مع الولاد التانية ويستحي انو بشرتو سمراء وما يرضى يلعب معن حتى الولاد ما يحبو يلعبو معو يحسو غريب وما بيندمج معن ويضل الطفل حزين ومرة اجا شخص من قرية تانية وبدو يبيع بالونات فصار يفكر بطريقة للفت الانتباه فأخد بالون ابيض وعباه بغاز الهيليوم وطيرو وبعدين عبأ بالون احمر وبعدين اصفر وبعدو ازرق بمشهد حلو وبلشو الأطفال يتجمعو حوليه ليشترو البالونات وفجأة!!

اجا الطفل اسمر البشرة وصار يتفرج ع بالونات بنظرة حزينة وبريئة وبأسف

وطلع ع صاحب البالونات بموقف عاطفي مؤثر والبؤس مبين ع وجهه وحكت عيونو قبل لسانو وقلو:

يا عمو لو طيرت بالون اسود رح يطير لفوق فنزل البائع ادام عظمة هاد الصبي بكل لطف وشفقة وطلع بعيونو وقلو:

اكيد رح يطير فيلي بخلي البالون يطير مو لونو يلي بخليه يطير يلي جواته

وقلو انت والولاد هدلون متل هالبوالين متل بعض و لو غير لون بس الطفولة يلي جواتكن نفسها

وعطاه بالون وقلو روح لعاب معن وشوف كيف كلكن نفس الشي

دمعو عيونو وقلو شكراً ياعمو

وفرحو الأطفال بانو انضم الهن و اجا يلعب معن وفرح صاحب البالونات انو شاف الضحكة ع وجوهن

وهيك بضل الجوهر هو الأساس

وهي القصة بتنطبق ع كتير مواقف بحياتنا مو ضروري نفس موقف القصة الضروري المبدأ والمفهوم يلي هو الجوهر🙏🙏

وبضل المحرك الاول للتميز هو شو بتملك من إيمان بالله وقدرات وارادة متينة وعزيمة قوية مو بالحسب ولا النسب ولا المال او الشكل ولا تقولو أصلي وفصلي أبداً الأصل هو بالشخص نفسه دون اب وحسن نسب

وكما قال تعالى" ان اكرمكم عند الله اتقاكم" وما حدد انو اجملكم او ابيضكم او اطولكم بس حدد الجوهر يلي هي التقوى

وفِي حديث

: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " إِنَّ رَبَّكُمْ وَاحِدٌ ، وَأَبَاكُمْ وَاحِدٌ ، وَنَبِيُّكُمْ وَاحِدٌ ، لا فَضْلَ لِعَرَبِيٍّ عَلَى أَعْجَمِيٍّ ، وَلا لِعَجَمِيٍّ عَلَى عَرَبِيٍّ ، وَلا لأَحْمَرَ عَلَى أَسْوَدَ ، وَلا لأَسْوَدَ عَلَى أَحْمَرالا بالتقوىَ ،